mercredi 28 octobre 2009

القصر الكبير.. بعد عام ونصف على أحداث ماسمي بزواج الشواذ



القصر الكبير.. بعد عام ونصف على أحداث ماسمي بزواج الشواذ




بإحدى المقاهي المجاورة لسوق سبتة ومحطة القطار يجلس فؤاد بين مسافرين ينتظرون قطارا " حدو طنجة" وبين تجار الكونطراباند الذين كانوا، إلى وقت قريب، مستعدين لتهريب كل سلع الأسواق الأوروبية باستثناء الحضارة!! لم تعثر " نيشان" وسط ضجيج المقهى الشعبي على رجل بملامح أنثوية ونبرات رقيقة.. لم تعثر إلا على شخص يدخن، بشراهة، سجائر أولمبيك الزرقاء، ويحكي عن حرائق أشعلها في المدينة تنين الإشاعة.


· باقيين تعقلو؟


أهمية مثل هذا السؤال، لا تقتصر فقط على معرفة ماجرى، بل أيضا منين كنشوفو سلوكات الناس بين الأمس واليوم. فالذين كانوا يتوعدون فؤاد بالحرق والرجم؛ يسلمون عليه بحميمية" أهلا خاي فؤاد..كيداير أ السي فؤاد" سائق الطاكسي الذي أقلّنا إلى" الكوري" بادر فؤاد بمجرد ما ركبنا: لهيه ياك؟ يقصد منزل فؤاد ... إيوا شنو.. واش الناس ما عندهوم ذاكرة .. ولا ماكانوش لخاطرهم؛ دارو الجدبة، دكَدكَو محلات الناس، أرعبو عائلات بأطفالها وشيوخها.. ومنين برد لهم الساكن طلبو المسامحة؟ ! واش هاد الشي كيعني بأن المجتمع مريض بحالة " عصاب"؟ الله يحفظ .


يوم 18 نوفمبر 2007 نظم فؤاد فريرط ليلة كناوية، كعادته، إلا أنه هذه السنة دار فيها يومين. النهار الثاني لادخل له فيه، يقول فؤاد. رئيسة أحد الأجواق الشعبية بالمدينة والمعروفة ب " حمص كامون " هي من أصرت أن تنظم الحفل في بيتها ومنين مابغاش راجلها، لجأنا إلى منزل آخر بحي الديوان، وهناك، يقول فؤاد، تفاجأت بفاطمة الزهرة " كَ " ( منافسة فؤاد، حينئد، في تجارة الخمور المهربة) جايّا بالهدية وبالغياط والكرسي ديال البرزة.. وقبل أن أبادرها بالسؤال عن مناسبة هاد الشي؛ قالت لي خلينا نفرحو مع راسنا..المهم الحفلة دازت بخير، ومن بعد تفاجأت بالفيديو ديال يوتوب.. والبيان ديال صحاب اللحي.. تما عرفت أن القضية مخدومة.


سألت "نيشان" نجيب وهو شاب في العشرينيات كان حاضرا في الحفلة " علاش حضرتي، كليتي وشربتي، ومن بعد خرجتي تقول اللهم هذا منكر؟ " فأجاب " شفت الحيحة .. وحتى أنا حيحت " قبل أن يقاطعه عبد الصمد، الذي بدا متحمسا إلى أن ما حدث هو " عرس حقيقي للشواذ"، " ولكن انت كنتي ضد هاد الشي بصح، فأجاب نجيب " اييه.. طبعا .. ولكن.. راه ماكان لا عريس لا والو.." !! ثم حكى لنا نجيب عن صديقه "ب.ع" الذي صور بهاتفه الفيديو الذي وُضع في يوتوب، متحسرا كيف أنهم خدمو كوانب، حيث كان يمكن ليهم يبيعو الفيديو لشي جهة ، بثمن مهم، ولكنهم تسرعوا وداروه فيوتوب.


في قلب شارع محمد الخامس وجنب نظارة الأوقاف يوجد محل الأخوين الطرنباطي للمجوهرات الذي هاجمه المتظاهرون يوم الجمعة 23 نوفمبر2007 ( لمجرد أن عائلة الطرنباطي تربطها علاقة تجارة بأحد مثليي المدينة ) قبل أن يحولوا اتجاه المظاهرة إلى منزل العائلة؛ حيث " هرسو ثلاثة ديال البيبان.. ولولا لطف الله وتدخل البوليس في آخر لحظة لكانوا قتلوا والدتي المسنة.. للي بقات فالمصحة 3 أشهر، وأصبحت تصاب بنوبة خوف كل يوم جمعة " يقول تاجر المجوهرات الخليل الطرنباطي .


· شكون المسؤول؟


مازال عدد من الناس ممن التقتهم "نيشان" يعتبرون أن فؤاد هو المسؤول الأول. يقول عبد الصمد " لولا أن فؤاد استفز مشاعر عباد الله ودار عرس ما كان يوقع والو". ولكن " المحكمة برأتني من العرس ولم تتابعني إلا بتهمة ممارسة الشذود والمتاجرة في الخمور" يرد فؤاد فريرط ثم يضيف " و زيدون حتى واحد ممن توبع بالشذوذ الجنسي ماشدوه متلبس .. حتى واحد ما جابو معاه صاحبو .. غير القضاء منين بغا يخلي الناس على خاطرهم عطى الأوامر ديالو للبوليس باش يسولو المعتقلين واش فايت مارسو الشذوذ مع شي حد.. أغلبية المستنطقين أجابو اييه ولكن دابا دايرين الله يعفو.. وهكاك لصقو لهم التهمة "


على من تقع مسؤولية التحريض على العنف إذن؟ "صحاب اللحي هما للي وزعو البيان وقالو فيه بأنه كان العرس" يؤكد فؤاد. وبالتالي فالتظاهرة لم تكن عفوية، حسب مقال لمحمد الساسي في الموضوع، فالاستعدادات تؤكدها اللافتات والبيانات وتحديد مكان وزمان الانطلاق؛ مسبقا؛ بحسب الساسي. ولكن التنظيمات الأصولية لم تدع إلى العنف في بياناتها؟ " منين كاتقول للناس بأنه كان عرس ديال الشواذ آش كتتوقع منهم يديرو؟" يتساءل فؤاد. أجي ومسؤولية الأفراد آش نديرو فيها؟ " الناس الذين ألقي عليهم القبض بمنزلنا تم تسريحهم.. فرغم أننا لجأنا إلى قاضي التحقيق بطنجة الذي أبدى استغرابه من ذلك، فمازلنا ننتظر" يقول الخليل الطرنباطي صاحب محل المجوهرات.


· كيفاش عايشين؟


بحال شي فلاح ديال الصح.. يدخل فؤاد للكوري الذي أقامه مكان البراكة للي كان كيبيع فيها الشراب، هناك يشتغل أخوه رفقة شخصين آخرين..يسألهم فؤاد عن بعض المسائل المتعلقة بالشغل، يتفقد أحوال أبقاره وأغنامه. غير بعيد يوجد المنزل حيث يسكن فؤاد رفقة ابنيه وزوجته الحامل. يرفع فؤاد يديه ويتنهد بعمق قبل أن يبتسم ويتابع" شي كان هنا كيفرع الباب والشراجم.. وشي كان فالبراكة كيخرج الصنادق ديال الشراب.. يا الله كلشي داز". في حي الدخان الذي تكثر فيه حركة البدويين الذين يفدون على المدينة أو يغادرونها إلى دواويرهم المجاورة؛ يتوقف فؤاد لشراء علبة سجائر قبل أن ينحشر وسط طاكسي في اتجاه صديقه الصرصري الذي يجلس خلف " طابلة " لبيع السجائر بالتقسيط قرب المستشفى المدني . حياة باقي المعتقلين على ذمة ما سُمّي بعرس الشواذ؛ تسير بشكل عادي؛ محمد الغرباوي " ولد حادة " الذي رفض أن يدلي لنا بأي تصريح، عاد كما كان، يفتح محل الحلاقة الذي أقفله يوم طلبه البوليس لمرافقتهم قصد الاستماع إليه فقط، ليجد نفسه متابعا بتهمة ممارسة الشذوذ. يحكي سمحمد الذي قضى مدة الاعتقال إلى جانبه " لم يتوقف ولد حادة عن البكاء إلا بعد أن صدر في حقه حكم بأربعة أشهر تم تخفيضها في الاستيناف إلى شهرين " ولد حادة ينتمي إلى أسرة ميسورة؛ ساندت ابنها في محنته، عكس " الحبيب" " للي تبرّا منو باه " يضيف سمحمد. باقي المعتقلين كانوا يحضون بزيارة أفراد عائلاتهم فقط ولم يسبق أن زارهم أحد الغرباء حتى ولو كان من الأصدقاء.. يؤكد لنا احد المسؤولين بالسجن المدني بالقصر الكبير فضل عدم الإشارة إلى اسمه ولو بحرف، عندما أسأله عن زيارة سمير بركاشي، رئيس جمعية كيف كيف للمعتقلين الستة؛ يجيب المسؤول السجني " لا..كذب ..كانت عندنا تعليمات صارمة باش مايزورهوم غير أفراد العائلة للي عندهوم تطابق الاسم العائلي.. " ثم يضيف " الإدارة كانت خايفة لا ينتقم منهم شي حد ويعطيهم شي حاجة فالماكلة.. الناس تبعوهم حتى للحبس وضربو باب المؤسسة بالحجر". " عزيز. خ" الذي اتهموه الناس بكونه العريس " خلط على فؤاد للحبس فقضية أخرى متعلقة ببيع شي سيارة.. ماكانش معاه فشومبر واحد " يحكي المسؤول السجني " ولكن كانو كيتلاقاو فالساحة وكيهدرو" أما محمد الصرصري ( 63 سنة) فلم تزره زوجته إلا لإخباره بنيتها طلب الطلاق. " فؤاد عندو شعبية.. هو معروف كيلبس لخواتم والسلاسل ديال الذهب.. وكيبيع ويشري فالشراب.. على داك الشي كان حامي صحابو.. وحتى المساجين كانو كيواسيوهم.. " يضيف سمحمد الذي جمعه بالمثليين نفس العنبر. الطاقة الإيوائية للسجن المحلي بالقصر الكبير لم تكن تسمح بأن يكون المثليون في غرفة خاصة بهم؛ كما يوجد بالسجون الكبرى. " كنا 30 واحد فالشومبر .. فؤاد كان قايم بالكَاميلة.. ماكلتو بنينة كيبغيوها جميع المساجين.. وماكانش كيطيح الصلاة!"


الرفاق دائخون


مباشرة بعد ظهور شريط يوتوب، الذي يظهر جزء من الحفل بادرت إحدى الجماعات الأصولية إلى صياغة عريضة تستنكر فيها الحدث. الغريب هو أن حتى الجمعية المغربية لحقوق الإنسان وقعت على العريضة، قبل أن تستدرك خديجة الرياضي " الزلقة " للي ارتكبها رئيس الفرع، وتقول أن الجمعية ليست معنية بهذا الموقف. منتدى حقوق الإنسان لشمال المغرب، المحسوب حتى هو على اليسار، مشى بعيد؛ حين أصدر بيانا ناريا يبتدئ بالمقطع الشعري" إنما الأمم الأخلاق ما بقيت.. " وكان من تداعيات ذلك البيان استقالة رئيسه الذي اعتبر البيان بغير الحقوقي. "سعيد" مناضل ينتمي إلى تنظيم يساري راديكالي؛ حيح حتى هو فالتضاهرة.. يبرر خروجه بكون المثليين في المدينة أصبحوا يشكلون لوبيا عقاريا خطيرا.. كما أنهم يشتغلون في تهريب الأطفال للاستغلال الجنسي !!أواااه .


الموقف الضائع في هذه الدوخة هو الموقف الحقوقي.. يقول عادل الخمليشي، صحافي وناشط جمعوي بالمدينة "حتى إذا قلنا بأن فؤاد وصحابو دارو عرس، واستفزوا مشاعر الناس.. واش يمكن لهاذ الناس ياخدو شرعهم بيديهم؟ وأي شرع؟ هدم البيوت وترهيب الأطفال والشيوخ. إيوا علاش هاذ الجمعيات ما خرجتش ببيان يدعو إلى حماية الأطفال... والممتلكات .. والضرب على أيدي من استغل التظاهرة لإلحاق الأذى بعباد الله؟"




















فؤاد فريرط :


سمير بركاشي كيكذب



· آش قال لك سمير بركاشي منين زاركم فالسجن؟


- شكون هاذ سمير بركاشي؟


· رئيس جمعية كيف كيف .. قال فالجريدة بأنه زاركم؟


- كيكذب.. الزيارة ديالنا كانت مقتصرة غير على الزوجة والوالدين


· عاود لنا كيفاش وقع لك ؟


- فاطمة الزهرة كَ هي للي تسبت لي فهاد الكارثة.. كنت غادي ندير كَناوة بحال ديما.. ناضت ح. ك مولات الجوق، وصاحبة فاطمة الزهرة، قالت لي نديرو كناوة فداري ونزيدو نهار آخر نجيب فيه الجوق ديالي .. راجلها كان خدام فسيدي قاسم منين جا تخاصم معاها ..نضنا عملنا كَناوة والجوق فدار أخرى.. أراك فاطمة الزهرا مشات جابت لهدية ..كروسة ديال الطحين والزيت تابعينها الغياطة.. منين كيسولوها الناس لمن هاذ لهدية كتقول لهم مافراسكومشي فؤاد غادي يتزوج براجل.. في الغد قالت لي فالتلفون غاديا نجيب الكوافورا.. قلت أنا ماغادي نخلصها ما والو خليها تفرح هي والبنات.. ناضت هي جابت الكرسي ديال البرزة والعمارية.. جيت لقيت داك الشي وأنا نزولو..خرجت لقيتها رجعاتو... فاطمة الزهرة باش يخلى لها الجو وتبيع الشراب بوحدها دارت هاذ القالب.. وصحاب اللحي باش يبينو راسهوم نوضو الحيحة.


· كيفاش خرجو التصاور؟


- للي صورو داك الشي بالتلفون جاو كيساوموني.. عطينا 5000 درهم ونمسحو صورتك من التلفون.


· ومن بعد؟


- سلمت راسي باش مايقتلونيش..المحكمة ماكرهتش تطلقنا نمشيو بحالنا ولكن الضغط كان كبير عليها.. البراءة ديالنا كانت باينة للجميع..أنا للي برّاني من العرس هم الناس للي كانو حاضرين.. رئيسة الجوق.. الطباخة.. المصور..كَناوة.. مولات الدار..جابوهم كاملين للكمويسارية وهما للي عطاوني براءتي.


· شكون للي ضخّم هاذ الشي فنظرك؟


- بعض الصحافيين هما للي بداو كيقولو حاجات ماعمرها وقعت.. هاذوك أنا إذا لقيتهم نبصق عليهم، ونويرهم الصورة للي ماشي ديالي وليت أنا مولاها. أنا بغيت نتبع حقي ما لقيتش للي يوقف معايا..داك الشي سبب لي فمرض السكر، كانو كيديوني كل أسبوع للسبيطار. ووصلت المراحل الخايبة ديال المرض. أنا عندي الوثائق للي كانت كتكذب علي وقالت بلا أنا درت العرس عندي البيانات والجرائد.. وأنا كنقول للي عندو دليل أنني درت عرس أنا نعاود نتحاكم.


· دوي لنا على علاقتك بالمثلية الجنسية.


- أنا داك الشي أنا رميتو من ورايا.. وديجا كنت واخد فيه غير الشوها ..علاقتي ما عمرها فاتت راجل واحد اغتصبني منين كنت طفل صغير، وكان كيغريني بالفلوس.. أنا أب لطفلين ومراتي دابا حاملة فست شهور.


· لا بغيت وجهت نظرك انت فالمثلية الجنسية.


- كل واحد حر فحياتو.


· كيفاش عايش دابا؟


- أنا الآن كنبيع ونشري فالمواشي، عايش مع وليداتي.. شي وحدين كانو كيقولو للناس راه غاديين ينفيوني 10 سنين..وغاديين يقتلوني الناس. ولكن أنا خرجت عادي من الحبس، ومن ساعتي خرجت ندور فالمدينة.










محمد الصرصري:


آش من شذوذ بقا فيّ..



أنا هربت لي لمرا وثلاثة ديال الدراري.. شهرين هادي وفؤاد كيخلص لي الكرا.. لو ما لقيتش فؤاد كون بقيت فالزنقة.. أنا عييت نراسل خديجة الرويسي وحقوق الانسان..أنا مسن ومظلوم..جاو عندي البوليس للدار قالو لي غادي تمشي معانا غير باش تشهد زدقت متهم..أنا ماعتارفت بوالو .. قلت لهم أنا عام 65 كنت أب لبنت.. أنا عمري 63 سنة آش من شدود بقا فيّ..خوتي وخواتاتي كيدوزو من حدايا ماكيسولوش فيّ حتى كيف بقيت.. لمرا طلقها لمخزن. كتقول للولاد إذا تبعتوا بّاكم عمركم تتزوجو.. أنا خرجت فيناير 2008 ما كانلقى حتى لي يدق عليّ الباب إلا فؤاد.. كنت على فراش الموت وكون ما وقفش معايا كون مت.


Aucun commentaire:

Enregistrer un commentaire